Gen 2 | TVK | STEP | Nggo sexien xil ak, Hi pol sein ut nesao, ut etan, e holesok xil vus xa ladi en e melengien tei he sav (6).

Genesis 2

1 Nggo sexien xil ak, Hi pol sein ut nesao, ut etan, e holesok xil vus xa ladi en e melengien tei he sav (6). 2 E melengien xa be lu he sav (7), xi mingel ra polien nan. 3 Misak ni, xi misep xol melengien xa be lu he sav (7) be melengien eo. Vengan xa e melengien nen ak, naha xa pol ni e ut etan bus e xi mingel ra polien nan.

Tetep Iaxa Hi Tepol ni Moletin e Melele xa Tetiamu

Senesis 2:4-9, 15-25

4 Ngan ak be tumulen usil naha xa testal e melele xa Iahova tepeas ni ut nesao e ut etan. E melele xa Iahova tepeas ni, 5 vatiei xil latehe tovuol tamu e utiei xil mun latnateh ti mu e ut etan vengan xa Iahova tapol ni ti us vamus. E moletin xil latehe tovuol tamu tengan latei tan. 6 E melele nen ak, neta tei texoni momah testal texo tan e tekas sein ut etan.

7 Di, Iahova mileh rut tan tatei e pol ni moletin ni. Melele xa pol ni bus, bui votiang nan te meulien be vulkusin, ma moletin ak meul e mitamea.

8 E ut xa be ist, Iahova miluh xat naho tei xa mahulong de ut xa lakesi ni 'Iden'. E rute ak vari, xi miling moletin xa pol ni ba da en. 9 E naho ak, Iahova misak ni vatiei savsav xil vus xa bos lameul e laso huite xil xa bos mak mu te anien en. E hilaep te naho ak, vatiei lu ludi en: tei xa huite mikila vasa meulien xa hoxalite teni tovuol, e tei mun xalu, huite mikila vasa kilakilen te naha xa bos e naha xa misa.

15 Ma Iahova miling moletin ak e Naho tahal Iden tengan vapol e tan e valaxati. 16 Di, biteni mini bit, “Xouk ukila ua huiei xil vus xa ladi e naho ak. 17 E vatiei tei takes xa mikila vasa kilakilen te naha xa bos e naha xa misa, vatiei ak onaxa huite ti vari. Vengan xa e melele xati xa ua ni, umat ihe reitin.”

18 Di, Iahova biteni bit, “Tavos ti tengan moletin ak vata tasen. Nipol ni tova mun xa ipin mini tengan mei laliti vituei itela e ti itutou ni.” 19 Misak ni, vongoro xil vus e tuman xil xa Iahova tepol ni xil ni tan, xi mikes xil lamei visal moletin ak tengan vapus xil e valing his e xil. Nggo sexien ak vari, xil langgur hise xil. 20 Ma, moletin ak miling his tuman xil vus e his vongoro xil mun. E xi tapus ti tova e xil xa vapin tengan vavituei vatela e vatutou ni.

21 Misak ni, Iahova pol ni met moletin ak minoh, ma xi pat e por vovong. E melele xa xi por sae, Hi minggur rat valsin tei be rani, e misak koe xol ven rilomun. 22 Di, Iahova pol ni atou ni sin ak, e ngguri ba milingi mi tiramue. 23 E melele xa tiramue pusi xi bit,

“Reitin mak, ngan ak nggoni nou vari.
Sin mistal nggo sieok; ven mistal nggo veok.
Misak ni, niling hisen ihe 'atou' vengan xa xi mistal nggo moletin.” ^{▼▼2:23 En sepinien na Siu xil, lakes moletin ni 'is'. E atou lakes ni 'issa', xa koute teni be 'mistal nggo moletin'.}

24 Ve rin ak, tiramue imea reling tamen xal ninen, e ihisti itel atou nan, e xalu lalihe tei takes.

25 E tiramue xal atou ludi hon, e lutave unoun ti ven.